Сайт тест режиминде!

Карақалпақстан Республикасы Нөкис қаласындағы мәмлекетлик ҳәм мәмлекетлик емес, жеке шериклик тийкарындағы мәмлекетлик емес ҳәм “шаңарақлық” мектепке шекемги билимлендириў шөлкемлеринде коронавирустың кирип келиўи ҳәм тарқатылыўының алдын алыў бойынша әмелге асырылған жумыслар.

Нөкис қаласындағы мәмлекетлик ҳәм мәмлекетлик емес, жеке шериклик тийкарындағы мәмлекетлик емес ҳәм “шаңарақлық”  мектепке шекемги билимлендириў шөлкемлеринде коронавирустың кирип келиўи ҳәм тарқатылыўының алдын алыў бойынша бир қанша әмелий жумыслар әмелге асырылмақта, атап айтқанда 2020-жыл 12-февраль күни барлық мектепке шекемги билимлендириў шөлкемлери мийрбикелери ҳәм Нөкис қалалық Санитария эпидемиологиялық тынышлық орайының эпидемиология бөлими баслығы шыпакер Д.Таңирбергенованың қатнасыўында Өзбекстан Республикасы Ден саўлықты сақлаў министрлигиниң 2020-жыл 24-январьдағы “Өзбекстан Республикасына ӨРИ, грипп, коронавирус инфекциясының жаңа түри кирип келиўиниң алдын алыў ис-иләжлары ҳаққында”ғы 14-санлы буйрығын басшылыққа ала отырып, мәжилис өткерилди.  Мәжилис барысында  усы жылы январ айының ақырларынан баслап Қытай  Халық  Республикасында короновирустың жаңа тип эпидемиясы жүзеге келгенлиги, сондай-ақ бул кеселлик қоңсылас Тайланд, Япония, Қубла Корея, Малазия ҳ.т.б мәмлекетлерде анықланғанлығын атап өтти. Күн тәртибиндеги мәселе бойынша Нөкис қалалық Санитария эпидемиологиялық     тынышлық орайы эпидемиология бөлими баслығы шыпакер Д.Таңирбергенова шығып сөйлеп коронновирус кеселлигиниң келип шығыў себеплери этиологиясы, эпидемиологиясы, патогенези, клиникасы ҳаққында жыйналғанларға кең түрде түсиндирип өтти.

Бөлимниң 2020-жыл 3-март күни 32-санлы буйрығы менен бөлим жанында короновирус инфекциясының алдын алыў бойынша Штаб қурамы дүзилип, короновирус инфекциясының профилактикасы бойынша ис илажлар режеси тастыйқланып, барлық мектепке шекемги билимлендириў шөлкемлерине жеткерилди.

Өзбекстан Республикасы Мектепке шекемги билимлендириў министрлигиниң усы жылдың 17-март күнги 42-санлы буйрығы тийкарында 2020-жылдың 16-март күнинен 31-март күнине мектепке шекемги билимлендириў шөлкемлери тәрбияланыўшыларына нәўбеттен тысқары дем алыс берилип ҳәм  шөлкем баслығы, методисти, медицина мийрбикеси, хожалық ислер меңгериўшиси, пол жуўыўшы (фаррош) ҳәм қараўыллар өз жумысларын даўам ететугынлығы, 2020-жыл 18-март күнинен 31-мартқа  шекем атлары көрсетилмеген хызметкерлерге нәўбеттеги мийнет дем алысына жиберилиўи хаққында 39-санлы буйрық қабыл етилди ҳәм орынларға жеткерилди.

Хәзирги ўақытта кесте тийкарында  барлық мәмлекетлик ҳәм мәмлекетлик емес, жеке шериклик тийкарындағы мәмлекетлик емес ҳәм “шаңарақлық”  мектепке шекемги билимлендириў шөлкемлеринде дезинфекция жумыслары “Нөкис дезинфекция” карханасы тәрепинен дезинфекция жумыслары алып барылмақта. Бөлим тәрепинен мәмлекетлик мектепке шекемги билимлендириў шөлкемлерине тазалаў ушын жуўыўшы затлар берилди.

Мектепке шекемги билимлендириў шөлкемлериндеги медициналық мийрбикелер тәрепинен ҳәр күни тәрбияланыўшылар арасында патронаж өткерилип,  ата-аналар арасында түсиник жумыслары алып барылып, олардың нәтижелери хаққында күнделик мағлыўматларды бөлим жанындағы Штабына усынылмақта.