Сайт тест режиминде!

2021-жыл 13-март күни https://t.me/Hoja_uz каналы арқалы жәрияланған видео мақалаға РӘСМИЙ ЖУЎАП

2021-жылдың 13-март күни Қарақалпақстан Республикасы Мектепке шекемги билимлендириў министри орынбасары Т.Байжанов 95 205 GBA номерли хызмет көлигин азанғы саат 08:00 ҳәм 09:25 аралығында https://t.me/Hoja_uz каналы жүритиўшилери видеокамера менен гүзеткен.

Өзбекстан Республикасы Нызамшылығында «Журналистлик искерлигин қорғаў» ҳаққында Нызам белгиленген. Оның 6-статьясында: «Журналисттиӊ мәжбүрятлары» көрсетилген, яғный;

«Шахстыӊ ҳуқықлары ҳәм еркинликлери, қәдир-қымбатын ҳүрмет етиў шәрт. Журналист өз кәсибине тийисли мәлимлемеден жеке мәпи ушын пайдаланыўы, мәлимлеме дерегин яки автор разылығысыз физикалық шахстыӊ жеке өмирине тийисли мағлыўматларды жәриялаўы, сондай-ақ, аудио ҳәм жазыў қуралларынан пайдаланыўы мүмкин емес» делинген.

Демек, бул жерде Нызам талапларыныӊ бузылғанлығы көринип тур. Хәр қандай блогер яки ғалаба хабар қураллары ўәкиллери өзлери топлаған материалларды сол шахстың разылығысыз, жәриялаўға ҳақысы жоқ. Бул жоқарыдағы Нызам шеӊберинде көрсетилген.

Сондай-ақ, Өзбекстан Республикасы «Жәмәәтлик қадағалаў» ҳаққындағы Нызамының 15-статьясында: «Мәмлекет уйымларының жумыс алып барыўы, сондай-ақ, әмелдар шахслардыӊ жумыс ислеўи ушын тосық жаратыў, пуқаралардыӊ қәдир-қымбатының кемситилиўине, олардыӊ жеке өмирине араласыўға жол қойыламайды» – деп көрсетилген.

Демек, бул орында да журналист (ямаса блогер) «Жәмәәтлик қадағалаў» ҳаққындағы Нызамды билмеген ямаса биле тура бузған.

Өзбекстан Республикасы Конституциясыныӊ екинши бөлиминде де: «Инсан ҳәм пуқаралардыӊ тийкарғы ҳуқықлары, еркинликлери ҳәм ўазыйпалары көрсетилген. Оның VII бабы Жеке ҳуқуқ ҳәм еркинликлерге арналған. Бундағы 27-статьяда «Хәр ким өз қәдир-қымбатына зыян келетуғын, жеке өмирине араласыўдан қорғаныў ҳәм турар қол қатылмаслық ҳуқуқына ийе. Хеш ким нызам шеӊберинде көрсетилген тәртиптен тысқары биреўдиӊ жасап турған үйине кириўи, тексериў өткериўи яки оны көзден кешириўи, ҳәр қыйлы жазыўлар ҳәм телефонда сөйлесиўлер, сырды әшкар етиўи мүмкин емес» деп көрсетилген.

Хурметли https://t.me/Hoja_uz каналы жүргизиўшилери, сиз ислеп атырған ҳәрекетлер нызамға қарсы келип турғаны анық көринип тур. Бундай ҳәрекетлер, әсиресе түсирилген видео Т.Байжановтыӊ разылығысыз ҳәм бир аўыз ескертиўсиз социал тармаққа жайластырған.

Демек, бундай жағдай инсан ҳуқықларыныӊ аяқ-асты етилгени, жеке өмирине араласқанлығынан дерек береди.

Каналда «Т.Байжанов мәмлекетлик хызмет көлигин өз мәпи жолында пайдаланып атыр» деген мазмунда көрсеткенсиз. Бул видео жазыўларда өзиниӊ шаӊарақ ағзаларын, күнниӊ кескин суўытып кетиўине байланыслы перзентлерин оқыў орынларына жақынлатқаны дурыс шығар. Усындай ҳаўа райыныӊ суўығында ҳәр бир ата-ана өз перзентиниӊ саламатлығын, қәўипсизлигин ойлайды. Буны инсаныйлық тәрептен де, юридикалық тәрептен де ойлап көрсеӊиз жақсы болар еди. Министр орынбасары ямаса әпиўайы жумысшы хызметкер болсын биринши болып өз шаӊарақ ағзаларын, перзентин ойлайды.

«еки ҳаялды мингизип…» деп көрсетилген видеода. Ол еки ҳаял биреўи өмирлик жолдасы екиншиси қарындасы. Олардың жумыс орынлары бир аймақта жайласқанлығы ушын Т.Байжановтыӊ хызмет көлигине минип жумыс орнына жақынлап қалған.

https://t.me/Hoja_uz каналы жүргизиўшилери сиз Т.Байжанов мәмлекетлик ҳызмет көлигин өз мәпи жолында пайдаланбақта деп көрсеткенсиз. Мағлыўмат сыпатында сизге соны айтып өтпекшимиз: Т.Байжановтыӊ өмирлик жолдасының жеке өзине тийисли жеке мәпи ушын жумсайтуғын өз көлиги бар. Бул хызмет көлигин күни-түни минип жүрген жоқ.

«Саат 8 ден өте Т.Байжанов жумыс орнында түсип қалды, жумыс ўақты саат 9 болыўына қарамастан» деп келтирилген видеода. Ҳүрметли https://t.me/Hoja_uz каналы жүргизиўшилери сизиӊ бундай пикир жүритиўиӊиз «тырнақ астынан кир излегендей» ҳәрекет емес пе? Ҳүрметли Президентимиздиң “Басшылар куни, түни ислеўи керек” деген гәпи бар. Соның ушын ол, министр орынбасары болғанлықтан жумыстыӊ көлемиде көп болады. Т.Байжанов сиз гүзеткен күни емес, дерлик ҳәр күни жумысқа ерте келип, басланажақ жумыс күни нәтийжелиги ушын реже дүзеди.

Және де «Мәмлекетлик машинаны жеке мәпине жумсағанда мәмлекет есабынан жанар майы кетип атыр…» деп көрсеткенсиз. Мәмлекет тәрепинен хызмет көлиги ушын жанар майы ажыратылатуғыны дурыс. Жанар майдыӊ да берилетуғын нормасы бар.  Берилген нормадан асып кетпейди. Себеби бул мәмлекет тәрепинен қадағаланады.

Усы орында Өзбекстан Республикасы «Мәлимлемелестириў ҳаққында»ғы Нызамныӊ 12/1-статьясына итибар қаратып өтпекшимиз: «Ҳәмме еркин пайдаланыў мүмкин болған мәлимлемени Интернет, жәҳан мәлимлеме тармағында тарқатыў» ҳаққында. Онда «Миллий, раса, этник яки диний келиспеўшиликти келтирип шығарыўшы, сондай-ақ, пуқаралардыӊ қәдир-қымбатына, яки жумыс белсендилигине кесент етиў, олардыӊ жеке өмирине араласыўға ҳәм мәлимлемени тарқатыў қадағаланады» деп көрсетилген.

Усы белгиленген талапларды бузған мәлимлеме тарқатыўшы Нызам ҳүжжетлерине муўапық жуўапкершиликке тартыўға себеб болып атыр. Және бир гәп, бул мәселе бойынша Т.Байжановқа Министрлик тәрепинен ескертиў шаралары көрилди. Бирақ, соны да умытпаң, жәмийетте соншама машқала турғанда қандай-да бир мәп пенен, я басқа да (бизге қараңғы) себеплерге байланыслы хызмет машинасын аңлыў, бир кимсениң қәтесин күтип оны жәмийетке алып шығыў кинолардағы эпизодға уқсап кетеди. Канал жургизиўшилери, ендиги жағында журналистлик тексериў алып барғанда барлық Нызам талапларын үйренип шығып, өзине тийисли жуўмақ шығарып, Нызам шеңберинде ис көреди деген үмиттемиз!

 

Қарақалпақстан Республикасы Мектепке шекемги билимлендириў министрлиги, Мәлимлеме хызмети.

 



Spelling error report

The following text will be sent to our editors: