Сайт тест режиминде!

БАҚШАМЫЗДА ӘМЕЛГЕ АСЫРЫЛЫП АТЫРҒАН БЕС БАСЛАМА

Президентимиз тәрепинен жаслардың бос ўақытларын мазмунлы шөлкемлестириў, олардың сана-сезимин, мәдениятын раўажландырыў мақсетинде 5 әҳмийетли басламаны әмелге асырыў ўазыйпалары белгилеп берилген еди. Бунда биринши баслама – музыкаға, сүўрет салыўға, әдебиятқа, театр ҳәм көркем өнердиң басқа түрлерине қызығыўшылығын асырыў, қәбилетин жүзеге шығарыў, екинши – дене тәрбиясы ҳәм спорт тараўындағы қәбилетин көрсетиў, үшинши – жаслардың компьютер технологиялары ҳәм интернеттен нәтийжели пайдаланыўы, төртинши – китапханлықты кең үгит-нәсиятлаў ҳәм бесинши- ҳаял-қызларды жумыс пенен тәмийинлеў нәзерде      тутылған.

Мине усы ийгиликли идея тийкарында бүгинги күнде бизиң мектепке шекемги билимлендириў шөлкемимизде   айтарлықтай жумыслар алып барылмақта. Атап өтер болсақ, семинарлар өткерилип, көргизбелер шөлкемлестирилди. Бундай көргизбелердиң шөлкемлестирилиўи балалардың дүньяқарасын өсирип, пикирлеў қәбилетин раўажландырыў менен бирге оларды ҳәр тәреплеме раўажланған ҳалда мектепке таярлаўда әҳмийетли роль атқарады.

Пикиримизше әҳмийетли бес басламаның биринши, екинши ҳәм төртинши басламалары мектепке шекемги билимлендириў шөлкемлери тәрбияланыўшылары ушын оғада әҳмийетли есапланады.

Себеби, кишкене жастағы балаларды музыкаға, қосық айтыўға, сүўрет салып, ертек тыңлаўға қызықтырыў арқалы оны әдебиятқа, театрға, көркем өнерге қызықтыра аламыз. Спортқа қызықпайтуғын бала болмайды. Сонлықтан биз оларды бақша дәўиринен баслап дене тәрбиясы менен шуғылланыў арқалы өзлериниң саламатлығын беккемлеўди үйретемиз. Биз бақша апалар тәрбия барысында тәрбияланыўшыларға ертекти аўызша айтып емес, ал китапты қолымызға алып көркемлеп, образлы етип оқып бериў арқалы оларды китап оқыўға қызықтырамыз. Себеби, балалар тәрбияшы қолындағы китапты тәрбияшысынан бурын өзлери оқығысы келип, ишиндеги ўақыяларды тез-тез билгиси келип қумарланады. Бул өз гезегинде балаларда китап оқыўға болған қызығыўшылықты арттырады. Сонлықтан биз ата-аналарға да үйлеринде ертек ямаса киши гүрриңлерди китаптан оқып бериўди мәсләҳәт етемиз. Ҳәтте айырым китапларды оқып бериўи ушын үйлерине де берип жиберемиз. Ол китапларды (оқып) тыңлап болған балалар ата-аналарынан жаңа китапларды оқып бериўин талап етиўлери бул бизиң жетискенлигимиз болып есапланады. Биз бул усылымыз арқалы тәрбияланыўшыларымызды  китапқумарлыққа тәрбиялап атырмыз деп мақтана аламыз.

Бизиң мектепке шекемги билимлендириў шөлкемимиз толық компьютер технологиялары менен тәмийинленбеген. Бул жерде ислеўши жас тәрбияшыларымыз компьютер технологияларынан, интернеттен пайдаланбаўы өз гезегинде тәрбияланыўшыларымызға соңғы технологиялардан пайдаланып тәрбия сырларын үйретиўге кери тәсирин тийгизип атыр. Бул мәселе де унамлы шешилсе бақшаларда бес басламаның толық әмелге асырылыўына ерисемиз. Бул өз гезегинде бақшамызда тәрбияланған балалар өмиринде үлкен әҳмийетке ийе болады деп есаплаймыз.

Айжан ЕСЕНҒАЛИЕВА

Нөкис районы Мектепке шекемги

билимлендириў бөлимине қараслы

4-санлы МШБШ тәрбияшысы