Сайт тест режиминде!

2021-жыл 7-июнь күни социал тармақларда тарқалған мүрәжат бойынша Қарақалпақстан Республикасы Мектепке шекемги билимлендириў министрлигинен РӘСМИЙ ЖУЎАП

Қарақалпақстан Республикасы Мектепке шекемги билимлендириў министрлиги тәрепинен исши топар дүзилип, мүрәжат бойынша Қанлыкөл районы мектепке шекемги билимлендириў бөлими хәм бөлимге қараслы мектепке шекемги билимлендириў шөлкем жумыслары бойынша үйрениў жумыслары алып барылды.

Үйрениў барысында Қанлыкөл районы мектепке шекемги билимлендириў бөлими баслығы М.Берданова Қарақалпақстан Республикасы Халық билимлендириў министрлигине қараслы районлық 6-санлы мектепке шекемги билимлендириў шөлкеминде  2006-2017-жыллар аралығында менгериўши лаўазымында жумыс ислеген. Ўсы шөлкемниӊ филиалы өз алдына юридикалык статус алып 9-санлы мектепке шекемги билимлендириў шөлкеми дүзилди. 2018-жылдан баслап усы шөлкемде М.Шамуратова  директор лаўазымында ислеп  келмекте.

М.Шамуратова ҳәм З.Қальниязова өз түсиник хатларында районлық мектепке шекемги билимлендириў бөлими баслығы М.Берданованыӊ  қарызын төлемегенлигин, шөлкемге бөлим баслығы тәрепинен  тексериў реже тийкарында келетуғынлығын ҳәм социал тармақларда берилген мағлыўматлар жалған екенлиги көрсетип өтти.

Районлық «10-санлы мектепке шекемги билимлендириў шөлкеми  баслығы А.Есенбаева М.Берданова сиӊлиси Г.Берданованы өли пай етип қойғанлығы…» ҳаққында көрсетилгенлиги бойынша үйренилгенде шөлкемге М.Берданова сиӊлиси районлық Бәнтлике көмеклесиў орайыныӊ жолламасы менен техник хызметкер лаўазымына жумысқа алынған ҳәм оннан да басқа 5 адам жоллама тийкарында жумысқа орналасқан. Ҳәзирги күнде усы шөлкемде Г.Берданова «Сипсекеш» болып жумыс ислеп келмекте. Шөлкем директоры ҳәм хызметкерлеринен соралғанда Г.Берданова ҳәр күни жумыста екенлигин, өз жумысын жуўакершилик пенен атқарып келмекте екенлигин айтып түсиник хатында көрсетип өтти.

Сондай-ақ, мүрәжатте «М.Берданованыӊ туўысқан сиӊлиси З.Берданова, М.Берданова бөлим баслық болып келгеннен соӊ З.Берданованы зорлық пенен өз лаўазымынан пайдаланып усы шөлкемге медсестра етип бекитти…» деп көрсетилген:

Исши топар тәрепинен үйренилгенде З.Берданова Берданов Худайназардыӊ ақлық қызы. Районлық бөлим баслық М.Берданова әкеси Берданов Сейтназардыӊ қызы. Бул апа-сиӊлилер аталас ағайын екенлиги мәлим болды.

З.Берданова районлық 1-санлы мектепке шекемги билимлендириў шөлкеми  2017-жыл 1-ноябрьде 82-санлы буйрық пенен жәрдемши тәрбияшы лаўазымына қабылланған. 2018-жыл 1-июль сәнесинен баслап, 128-санлы буйрық тийкарында жәрдемши тәрбияшыдан мийрибийке лаўазымына өзгертилген. Ол ўақытта шөлкем Қарақалпақстан Республикасы  Халық билимлендириў министрлигиниӊ районлық бөлимине қараслы болған. Сол ўақытта Қарақалпақстан Республикасы Мектепке шекемги билимлендириў министрлигиниӊ Қанлыкөл районы мектепке шекемги билимлендириў бөлими шөлкемлестирилмеген. Бул районлық мектепке шекемги билимлендириў бөлимге бөлим баслық болып М.Берданова 2017-жыл 9-ноябрь күни тайынланған.

Өзбекстан Республикасы Мийнет Кодексиниӊ 79-статьясына тийкар «өз-ара жақын қарындаслар, олардыӊ бири екеншисине тиккелей бойсынып яки оныӊ қадағалаў астында хызмет еткен болса бир мәмлекетлик кәрханада бирге хызмет етиў қадаған етиледи» деп көрсетилген.

З.Берданова менен М.Берданова бир бөлимде ҳәм тиккелей бойсыныўында ислмейтуғынлығын мәлим етип билдиремиз.

Соныӊ менен бир қатарда  1-санлы МШБ шөлкеминиӊ хожалық ислери бойынша менгериўшиси Г.Отебеава  азық-аўқат өнимлерин жеткерип бериўши (поставщик) тәрепинен алып келинеди ҳәм жүк хаты менен қабыллап алынады. 1-санлы МШБШ директоры ў.ў.а Э.Жумамуратованыӊ басшылығында мийрибийке менен биргеликте азық-аўқат өнимлери тексерилип, өлшеп алынатуғынлығын айтып өтти.

Мүрәжатте «азық-аўқат өнимлерини жеўге жарамсыз, мүддети өткен өнимлерди қабыллап аламыз, қабылап алмасақ М.Берданова …» -деп көрсетилген. Бул бойынша исши топар тәрепинен райондағы  мектепке шекемги билимлендириў шөлкемлери директорлары, хожалық ислери меңгериўшилери менен сойлесилгенде бундай жағдай болмағанлығын ҳаққында тусиник хатларын берди. Усы мәселе бойынша райондағы            10-санлы мектепке шекемги билимлендириў шөлкеминде азық-аўқат өнимлери сыпаты уйренилди. Уйрениўде шөлкемге қабыл етилген азық-аўқат өнимлери сыпаты талап дәрежесинде алынғанлы ҳәмде мектепке шекемги билимлендириў шөлкеминде тағамнама 0348-17-санлы санитария қәде ҳәм норматив ҳужжет талаплары бойынша дузилген. Тағамнама               1 нусқасы асханада, 1 нусқасы тәрбияланыўшылардың ата-аналары көриў ушын шөлкем кирер есик алдына қойылған. Қоймаханада азық-аўқат өнимлери санитария талаплары бойынша сақланбақта.

Райондағы барлық шөлкемлерине  «Айдос Диярбек» атлы дүканынан 2000-жылдан баслап азық-аўқат өнимлери жеткерилип келинбекте. Сондай-ақ бөлим тәрепинен азық-аўқат өнимлери жеткерип бериў бойынша шәртнама дузиў ушын азық-аўқат өнимлерин жеткерип бериўши ибилерменлерден коммерциялық усыныслар алынып, арзан баҳадағы усыныс қабыл етилиўи жолға қойылған. Май айында азық-аўқат өнимлерди жеткерип бериў бойынша «Қанлыкөл Голд Саўда», «Гаўҳар сулыў» ҳәм «Айдос Диярбек» кәрханаларынан жеткерип бериў бойынша коммерциялық усыныслар қабыл етилип, усыныс комиссия тәрепинен көрип шығылып  «Айдос Диярбек» кәрханасы усынысы мақулланған. Комиссия тәрепинен район бойынша май айында 13 мәмлекетлик мектепке шекемги билимлендириў шөлкемлери ушын 4 кәрхана азық-азық өнимлерин жеткерип бериўши таңлап алынған.

«М.Берданова бөлим баслық болғаннан баслап 1, 2, 3, 6, 7, 8, 9, 10, 12 шөлкемлердиӊ қурылыс жумысларына араласып кетти ҳәм усы шөлкемлердиӊ қурылыс жумысларына “БАКУ” атлы фирмасына ислетти…”-деп көрсеткен:

Бул бойынша үйренилип шығылғанда районлық мектепке шекемги билимлендириў шөлкемлеринде 2018-2020 жыллар аралығында “MAXBUILD” ЖШЖ, “ARAL BOYI QURILISSHILARI” ЖШЖ, “QURILIS INVEST QANLIKOL” ЖШЖ менен шәртнама дүзилип қурылыс оӊлаў жумыслары алып барылғанлығы мәлим болды.

Қарақлпақстан Республикасы Мектепке шекемги билимлендириў министрлигиниӊ исши топар тәрепинен Қанлыкөл районы мектепке шекемги билимлендириў бөлими ҳәм шөлкемлеринде үйрениў жумысларыныӊ жуўмағы бойынша, мүрәжатта көрсетилген қәте-кемшиликлер өз тастыйғын таппағанлығын мәлим етип билдиремиз.

(Рәсмий мағлыўмат министрликтиӊ тийисли қәнигелери тәрепинен таярланды)

 

ҚР Мектепке шекемги билимлендириў министрлиги Мәлимлеме хызмети