Сайт тест режиминде!

Қарақалпақстан Республикасы Мектепке шекемги билимлендириў министрлигинде «Коррупцияға қарсы гүресиў бойынша алып барылып атырған жумыслар» ҳаққында кеӊейтирилген мәжилис болып өтти.

Мәжилиске Қарақалпақстан Республикасы Жоқарғы Кеӊеси депутаты Нызамшылық суд-ҳуқық ҳәм коррупцияға қарсы гүресиў мәселелери комитети баслығы З.Реймова, Қарақалпақстан Республикасы Жоқарғы Кеӊеси депутаты, Нөкис қаласы 31-санлы улыўма орта билим бериў мектебиниӊ директоры В.Қаленова, Нөкис қалалық Кеӊеси депутаты, НМПИ Жәмийетлик пәнлер кафедрасыныӊ баслығы, доцент Я.Абдуллаева, Қарақалпақстан Республикасы Мектепке шекемги билимлендириў министри Ж.Уснатдинова, министрдиӊ биринши орынбасары Т.Байжанов, район (қала)лық мектепке шекемги билимлендириў бөлим баслықлары, министрликтиӊ хызметкерлери қатнасты.

Мәжлисти Қарақалпақстан Республикасы Мектепке шекемги билимлендириў министри Ж.Уснатдинова кирис сөз бенен ашты ҳәм алып барды.

Мәжилисте Қарақалпақстан Республикасы Жоқарғы Кеӊеси депутаты Нызамшылық суд-ҳуқық ҳәм коррупцияға қарсы гүресиў мәселелери комитети баслығы З.Реймова сөзге шығып ол –коррупция бул перзентлер келешегине сая салыўшы унамсыз иллет, пара бериўде, пара алыўда жынаят екенлигин, бунда қарсы гүресиўде   мектепке шекемги билимлендириў шөлкемлери менен тығыз бирге ислесиў ҳәм келешегимиз болған балаларды бундай унамсыз иллетлерден аўлақ етип тәрбиялаў баслы ўазыйпа екенлигин айтып ѳтти.

Сондай-ақ, депутатлар тәрепинен ҳәр бир мектепке шекемги билимлендириў шѳлкемлеринде «Әдиллик қутысын шѳлкемлестириў, үш айдан бир  коррупцияға қарсы гүресиўде алып барылып атырған жумыслар бойынша МПЖ менен биргеликте есабат тапсырыў, «Мениӊ бақшам коррупциясыз» атамасында илажлар шѳлкемлестириў бойынша усынысларын билдирди.

Депутатлар тәрепинен  берилген усыныс ҳәм пикирлер министрликтиӊ хызметкерлери тәрепинен мақулланып ҳәм алдағы ўақытларда реже тийкарында әмелге асырылып барылатуғынын мәлим етип билдирди.

ҚР Мектепке шекемги билимлендириў министрлиги Мәлимлеме хызмети